విష్ణువాహ! నమస్తుభ్యం।  
క్షేమం కురు సదా మమ।।

అధర్వణ వేదాంతర్గత

8     గారుడ ఉపనిషత్

అధ్యయన పుష్పము

శ్లో।। విషం ‘బ్రహ్మ’ అతిరిక్తంస్యాత్। అమృతం బ్రహ్మసూత్రకమ్। బ్రహ్మ - అతిరిక్త విషహృత్-బ్రహ్మమాత్ర ఖగేడహమ్।।

‘విషము’ అనగా ఏమి? ఈ దృశ్య వ్యవహారమంతా బ్రహ్మమునకు అన్యముగా (వేరుగా) అనిపించటమే విషముతో సమానము. ఈ దృశ్య విశేషములను కూడా బ్రహ్మమునకు వేరుగా చూడటమే - ‘మృతము’. సమస్తము ‘బ్రహ్మసూత్రము’గా దర్శించటమే ‘అమృతము’. అట్టి ‘బ్రహ్మమునకు వేరుగా అనిపించటము’ అనే విషమును తొలగించి, ‘సమస్తము బ్రహ్మమే’ అను రూపమగు పాఠ్యాంశమును అమృతముగా దివ్యలోకముల నుండి తెచ్చి ప్రసాదించు కార్యము నిర్వర్తించు శ్రీగరుడ జగద్గురు భగవానునికి నమస్కరిస్తున్నాము.

---

బ్రహ్మభగవానుడు : ‘ఓం’।। ఓ నారదాది సమస్త మునిజనులారా! సమస్త జీవులారా! ఇప్పుడు ‘అనేకము’ అనే విషమునకు ఔషధముగా సమస్త విషములను ఖండించు, దూషింపజేయు, నశింపజేయు ‘‘గారుడ బ్రహ్మవిద్య’’ను బోధిస్తున్నాను.‘‘అన్యము, మృత్యువు’’ అనే విషమునకు విరుగుడు అయినట్టి ‘‘అనన్యము, అమృతము’’లను ప్రసాదించు గారుడ మంత్రరూప మహాగారుడోపాసన గురించి వినండి.

⌘

ఈ విధంగా బ్రహ్మవిద్య అగు ‘గారుడవిద్య’ను పితామహులగు బ్రహ్మ భగవానుడు బ్రహ్మ మానసపుత్రులగు శ్రీమన్ నారద, సనక, సనందన, సనత్కుమార సనత్సుజాతాది బ్రహ్మ మానసపుత్రులకు, మునులకు, ఋషులకు కూర్చోబెట్టి బోధించారు. అట్టి గారుడోపనిషత్‌ను నారదమహర్షి బృహత్సేనునికి, బృహత్సేనుడు త్రిలోకాధిపతి అగు ఇంద్రదేవునికి, ఇంద్రుడు భరద్వాజమునికి, భరద్వాజుడు తనను (తమ ఇంద్రియ విషయ విషముల నుండి విముక్తి కొరకై) ఆశ్రయించిన జీవత్ కామేభ్యునికి, వారి శిష్యగణమునకు-బోధించటం జరిగింది.

ఆ విధంగా ముముక్షువులకు ‘‘శ్రీమహాగరుడ బ్రహ్మవిద్య’’- బ్రహ్మము గురించిన సిద్ధికై సాధనగా - ‘పరంపర’ అయి, తత్త్వ వాఙ్మయ - తత్త్వసాధనలలో ప్రసిద్ధమైయున్నది.

⌘

శ్రీ మహాగారుడ బ్రహ్మవిద్య

అస్యాః శ్రీ మహాగరుడ విద్యాయా...,
‘బ్రహ్మా’ ఋషిః। గాయత్రీ ఛందః ।।

శ్రీ భగవాన్ గరుడో దేవతా। - ‘‘శ్రీ మహాగరుడ ప్రీత్యర్థే’’ మమ ‘‘సకల విష వినాశనార్థే’’ జపే వినియోగః।।

‘ఇంద్రియ విషయములు’ అనే ‘అన్యము’ రూపమగు ‘విషయ విషము’ (The Poison of Bondage because of irresistable relatedness with worldly scenary, events, contexts, relationships, expectations etc.,) విరుగుటకై గరుడ మంత్రమును ఆశ్రయిస్తున్నాము. ఋషి ‘బ్రహ్మగాను, ఛందస్సు గాయత్రీ గాను, దేవత - భగవంతుడు శ్రీ గరుడ భగవానునిగాను - శ్రీ మహాగరుడుని ప్రీతికొరకై వినియోగిస్తూ ధ్యానము ప్రారంభిస్తున్నాము :

ఓం నమో భగవతే। అంగుష్ఠాభ్యాన్నమః।	ఓం నమో భగవతే। హృదయాయ నమః
శ్రీ మహా గరుడాయ తర్జనీభ్యాం స్వాహా।	శ్రీ మహా గరుడాయ శిరసే ‘స్వాహా’।
పక్షీంద్రాయ మధ్యమాభ్యాం ‘వషట్’	పక్షీంద్రాయ శిఖాయ ‘వషట్’।
శ్రీ విష్ణువల్లభాయ అనామికాభ్యాం ‘హుం’।	శ్రీ విష్ణువల్లభాయ కవచాయ ‘హుం’।
త్రైలోక్య పరిపూజితాయ కనిష్ఠికాభ్యాం ‘వౌషట్’।	త్రైలోక్య పరిపూజితాయ నేత్రతయాయ ‘వౌషట్’।
ఉగ్రభయంకర కాలానల రూపాయ కరతల కర పృష్ఠాభ్యాం ‘ఫట్’।	ఉగ్రభయంకర కాలానల రూపాయ అస్త్రాయ ‘ఫట్’।

భూర్భువస్సువః ‘ఓం’ ఇతి-దిక్ బంధః। (దిగ్బంధః)

‘‘భూ భువ సువర్లోకములు ("Matter, Thought, Sense of Self" Zones) - ఈ మూడూ కూడా ఓంకారమగు ఆత్మ విన్యాస ప్రదర్శనమే’’ అని - మననము చేయుచు, - దిక్కులను బంధించి (Sans Distractions) ఉపాసన ప్రారంభిస్తున్నాము (Commencing the concentration).

ధ్యానము :

శ్లో।। స్వస్తికో దక్షిణం పాదం। వామపాదం తు కుంచికమ్।
ప్రాంజలీకృత దోర్యుగ్మం। గరుడం హరివల్లభమ్।।

కుడిపాదము ‘స్వస్తికము’ గాను, ఎడమ పాదము ‘కుంచితము’గాను (మడచి) ఉంచి శ్రీహరికి రెండు చేతులతో నమస్కరించుచున్నవారు, ఆ శ్రీహరికి బహు ఇష్టమైనవారు అగు శ్రీ గరుడ భగవానుని ధ్యానించుచున్నాను.

✤ అనంతో వామ కటకో। - ‘అనంత’ మహాసర్పమును తమ ఎడమ చేతికి కంకణము (కడియము)గాను,
✤ యజ్ఞసూత్రం తు వాసుకిః। - ‘వాసుకి’ మహాసర్పమును యజ్ఞసూత్రముగాను, (జందెము, యజ్ఞోపవీతముగాను),
✤ తక్షకః కటి సూత్రం తు। - ‘తక్షక’ మహాసర్పమును మొలత్రాడు (కటిసూత్రము)గాను,
✤ హారః కర్కోట ఉచ్యతే। - ‘కర్కోట’ మహాసర్పమును హారముగాను,
✤ పద్మో దక్షిణ కర్ణేతు। - ‘పద్మ’ మహాసర్పమును కుడిచెవి చుట్టుగాను,
✤ మహా పద్మస్తు వామకే। - మహాపద్మమహాసర్పమును ఎడమ చెవి ఆభరణము (లేక చుట్టు) గాను,
✤ శంఖః శిరః ప్రదేశేతు। - ‘శంఖు’ మహాసర్పమును తలపైన,
✤ గుళికస్తు భుజాంతరే। - ‘గుళిక’ మహాసర్పమును భుజముల మధ్యగాను,
✤ పౌండ్ర కాళిక నాగాభ్యాం చామరాభ్యాం సువీజితమ్। - ‘పౌండ్ర’ కాళిక సర్పములను చామరములు వీచువారుగాను,
✤ ఏలా పుత్రక నాగాద్యైః సేవ్యమానం ముదాన్వితమ్। - ‘ఏలా పుత్రక’ మొదలైన మహానాగులచే సేవించబడువారు,
బ్రహ్మానందమును ముఖమునందు చిందించువారు (ముదితానందులు)-అగు గరుడ భగవానుని దివ్య సాకారమునకు నమస్కారము.

---

★ కపిలాక్షమ్। - గోరోజనము (కపిల) రంగు కళ్ళు కలవారు,
★ గరుత్మంతమ్। - (గ) సర్వ శ్రేష్ఠమైన, (ఋత్) పరమ సత్యమును స్వానుభవముగా గలవారు,
★ సువర్ణ సదృశ ప్రభమ్ - బంగారు కాంతులతో ప్రకాసించువారు,
★ దీర్ఘ బాహుమ్। - పొడవైన బాహువులు (రెక్కలు) కలవారు,
★ బృహత్ స్కంధమ్। - పెద్ద స్కంధములు (మూపులు) కలవారు,
★ నాగాభరణ భూషితమ్। - నాగాభరణ భూషితులు (పాములను ఆభరణములుగా ధరించినవారు),
★ ఆజానుతః సువర్ణాభమ్। - బంగారు రంగులో మెరయుచున్న మోకాళ్లు కలవారు,
★ ఆకట్యోః తుహిన ప్రభమ్। - తెల్లగా మెరయుచున్న మొల కలవారు,
★ కుంకమారుణమ్ ఆకంఠం। మెరుస్తున్న ఎర్రటి కంఠము కలవారు,
★ శరత్‌చంద్ర నిభాననమ్। - శరత్‌కాల పూర్ణ చంద్రుని వలె ముఖము కలవారు,
★ నీలాగ్రనాసికా వక్రమ్। - నీలము రంగుతో ప్రకాశించు ముక్కు చివర వంకరగా కలవారు,
★ సుమహత్ చారుకుండలమ్। - సుమహత్‌గా (అందముగా) ప్రకాసించు దీర్ఘమైన కుండలములను ధరించినవారు,
★ ద్రంష్ట్రా కరాళ వదనమ్। - కోరలతో భీకరమైన నోరు కలవారు,
★ కిరీట మకుటోజ్వలమ్। - కిరీటముతో ప్రకాశమానగుచున్న నుదురు కలవారు,
★ కుంకుమారుణ సర్వాంగమ్। కుంకుమవలె ఎర్రటి సర్వాంగములు కలవారు,
★ కుందేందు ధవళాననమ్। - తెల్లటి తామర వంటి ప్రకాశమానమగు ముఖము కలవారు,
★ విష్ణువాహ। విష్ణు భగవానునికి వాహనమైనవారు,
అగు ఓ గరుడదేవా! గురుదేవా! మీకు నమస్కారము : విష్ణు వాహన నమస్తుభ్యం। క్షేమం కురు యదా మమ। స్వామీ! నమస్కారము. నాకు క్షేమమును ప్రసాదించమని ప్రార్థిస్తున్నాను. రక్షించమని వేడుకుంటున్నాను.

⌘ ⌘ ⌘

ఈ విధంగా త్రి సంధ్యలలోను నాగభూషణుడగు గరుడ భగవానుని ధ్యానించువారి పట్ల - తూలా రాసిలో (మంచు దట్టముచే) అగ్నిశిఖలు శమించు తీరుగా - (ఇంద్రియ విషయములు అనే) విషము యొక్క ప్రభావము శమించగలదు. ‘‘దృశ్యము నిజమే’’ అనే భవబంధరూప విషానుభవము ఖండనమవగలదు.

‘ఓం’ ఈం। ఓం నమో భగవతే। శ్రీ మహాగరుడాయ। పక్షీంద్రాయ। విష్ణువల్లభాయ। త్రైలోక్య పరిపూజితాయ। ఉగ్రభయంకర కాలానలరూపాయ। వజ్ర నఖాయ। వజ్ర తుండాయ। వజ్ర దంతాయ। వజ్ర దంష్ట్రాయ। వజ్రపుచ్ఛాయ। వజ్రపక్షాలంకృత శరీరాయ। ఓం। ఈం। ఏహ్యేహి। ఓం ఈం ఓం। భగవతే।

శ్రీ మహాగరుడ స్వామీ! పక్షీంద్రా! విష్ణు వల్లభాయ। స్వర్గమర్త్య పాతాళములలో పూజింపబడువాడా! ఉగ్రభయంకరమైన కాలాగ్ని స్వరూపా! వజ్రము వంటి - గోళ్లు, తుండము, దంతములు, కోరలు (దంష్ట్రము), నుదురు (పుచ్ఛము), రెక్కలు (పక్షములు) మొదలగు విశేష లక్షణములు గల గరుత్మంతుడా! ‘ఓం’ కార సంజ్ఞా పరమార్థమగు సర్వాత్మక - పరమాత్మక- స్వస్వరూపాత్మక స్వరూపా! ‘ఈ’ సమస్తము నీవే అయి ఉన్న ‘ఈం’ స్వరూపా!

ఏహి= ఇక్కడ మేమున్నచోటికి, మా హృదయములలోకి -    (ఏహి) = వేంచేయండి!

ఓం మహాగరుడా = సర్వజీవులలో సంప్రకాశరూపముగాను, ఆరూఢముగాను, నిశ్చలముగాను, పరాకాష్ఠగాను వేంచేసియున్న ‘గరుడుడవు’. (గ - శ్రేష్ఠమగు సత్యస్వరూపుడవు). మహత్ స్వరూపుడవై (ఇంద్రియములు అనుభూతులు, అనుభవములు మొదలైన) సమస్తము నీ మహత్ స్వరూపముగా కలిగియున్నవాడవు. ఓ మహాగరుడా! విష్ణు వాహనా! నమో నమః।।

అప్రతిహత శాసనాస్మిన్: ఆత్మస్వరూపుడవై సమస్తమును అప్రతిహతంగా (Unstopably, Irresistably) శాసించువారై, వాటిని మీయందే కలిగి యుండువాడా!

నః అవిశావిశ : మాయందు ప్రవేశించండి. మా హృదయమును ఆవేశించి ఉండండి.

దుష్టానాం విషం దూషయ। దూషయ। : శ్రీమాన్ గరుడ స్వామీ! మాలోని దుష్ట స్వభావములగు కామ క్రోధ లోభ మోహ మద మాత్సర్యవర్గములచే మాలో కలుగుచున్న విష స్వభావములను తొలగించండి। ‘దుష్టత్వము’ అనే విషమును దూరం చేసివేయండి.

స్పృష్టానాం విషం నాశయ। నాశయ। ఓ గరుడాత్మ దేవా! మేము ఈ ఇంద్రియములచే స్పర్శిస్తున్న వస్తు - సంగతి - సందర్భములతో ఏర్పరచుకొంటున్న దుష్ట సంబంధముల వలన అనేక భేదదృష్టులను, విషభావములను తెచ్చిపెట్టుకొని, వాటి ఫలితంగా నికృష్ట దాస్య బంధనములు తెచ్చిపెట్టుకొంటున్నాము. ఆ విధంగా మాయందు పేరుకొనియున్న విష స్వభావములను, దుష్ట వాసనలను, విష సంస్కారములను-నశింపజేయండి. శారీరక-మానసిక-బుధ్యాత్మక దుష్ట అభ్యాసములను, వ్యసనములను నాశనము చేసివేయండి. రహితము చేయండి.

దందశూకానాం విషం దారయ। దారయ। దందశూకముల (రెండు తలల విషపాముల) దందశూకల (రాక్షస స్వభావుల) - (మాలోని స్వభావ)-విషమును చీల్చివేయండి.

‘‘ద్వంద్వమోహము’’ అనే రెండు తలల పాము యొక్క విషమును మా హృదయములనుండి పిండివేయండి.

ప్రలీనం విషం ప్రణాశయ। ప్రణాశయ। మాలో జన్మజన్మలుగా జీర్ణించుకొని, మనోబుద్ధి చిత్త అహంకారములలో పేరుకొనియున్న దుష్టరూపములగు దోష సమన్వయరూప విషమును (Poisonous interpretation) మొదలంట్లా నశింపజేయండి.

సర్వ విషం నాశయ। నాశయ। మాలోని సమస్త విషబుద్ధి - భావన - యోచనలను నశింపజేయండి. మాలోని - మమ్ము స్పృశించే విషమును హన - హరించివేయండి. (హననము చేయండి, చంపివేయండి). దహ-దహించివేయండి. పచ - మూర్ఖ ఘనీభూత అల్ప, విష భావనలన్నీ పచనము చేసివేండి. వండి వేయించివేయండి.

భస్మీకురు : మాలోని నీచ - ద్వేష - పాప వ్యసన దృష్టి - సంకల్పములను భస్మీభూతము చేయండి. కాల్చి, భస్మము చేసివేయండి.

---

హే ప్రభూ! చండ్రమండలము వలె జీవులకు ఓషధి-ఆహారములను ఇచ్చి సమస్తము ప్రశాంతపరచువాడా! సూర్యమండలము వలె స్వయం ప్రకాశ - సమస్త ప్రకాశక స్వరూపా! అజ్ఞానాంధకారము వలన ఏర్పడిన విష స్వభావమును ఖండించివేయు ముష్టికము (కత్తిపిడి) వంటివారా! ఈ సమస్త పృథివి మీ యొక్క అంగముగా కలిగియున్నట్టి ముద్రాంగా!

శ్రీ మహా గరుడ భగవాన్!

విషం హర - మాలో ఏర్పడి ఉండి మమ్ములను గాయపరుస్తున్న ఆధిభౌతిక-ఆధిదైవిక-ఆధ్యాత్మిక విషమును హరించివేయండి.

హుం ఫట్ స్వాహా! మీ యొక్క ‘‘హుం’’కార శబ్దోచ్ఛారణతో విషమును ‘‘ఫట్’’ శబ్దోచ్ఛారణతో దులిపి వేయుచూ, - మాలో దైవీ సంపత్తిని ప్రేరేపించండి.

ఓం క్షిప స్వాహా। మేము ఆత్మభావము నుండి అనుక్షణము విక్షేపణము (ఎగురవేయటము) పొందుచున్నాము. మాలో దైవీగుణములను ప్రేరేపించి సువర్లోక మార్గము చూపండి. స్వాహా। మా మనస్తత్వమును దివ్యలోకములకు జేర్చండి. (క్షిప = ప్రేరేపించటము. ఎగురవేయటము)

ఓం ఈం। ‘ఓం’కార పరమాత్మ స్వరూపుడగు శ్రీమన్ గరుడ భగవానుడే ఈ సమస్తముగా ప్రకాశమానుడగుచున్నారు.

స చరతి। స చరతి : ఈ సర్వముగా చరిస్తున్నది ఆ శ్రీ గరుడాత్మ భగవానుడే।

తత్కారీ : శ్రీ గరుడ గురుదేవ భగవానుడు మమ్ములను ‘తత్త్వమ్’ వాక్యార్థముచే అమృతాత్మానంద స్వరూపులుగా, తత్ స్వరూపులుగా తీర్చిదిద్దుదురు గాక। ‘‘త్వమ్-నీవు’’ - నందు ‘‘తత్ (ఆత్మ)’’ దృష్టిని నిదురలేపెదరు గాక। ‘పర’ సుఖము ప్రసాదించెదరుగాక।

మత్కారీ : నాకు సమస్తము ప్రసాదించువారు. సమస్త జీవులలో ‘‘మత్-నేను’’ స్వరూపులై ఉన్నవారు. మాలోని ‘నేను’ను సమస్త జీవులలోని ‘‘మహత్ నేను’’గా తీర్చిదిద్దెరు గాక! ఇహ సుఖ-సంపదలను కూడా అనుగ్రహించెదరు గాక।

(మతకము = మాయ. మాయాలీలా రూపధారులు. మా కొరకై ఈ సమస్తము ప్రసాదించుస్వామీ మీరే!)

‘‘విషమునకే విషము’’ అయిన అమృత రూపధారులు। విషమునకు దూషిక (కుంచె) వంటివారు. విషమును శోషింపజేయువారు. విషమును హరించువారు।

ఓ గరుడ దేవా! మీ స్మరణచే విషము హతమగుచున్నది. విషము వినష్టమగుచున్నది. విషము అంతమై ప్రలీనము (విశేషముగా కరిగిపోవటము) జరుగుచున్నది. విషము ప్రణష్టమగుచున్నది. మీ స్మరణచే సృష్టికర్తయగు బ్రహ్మదేవునిచే లీలగా కల్పితమగు విషయ పరంపరలు విషరూపముగా అవటమనేది తొలగించబడగలదు. మీ గురించిన భావనచే అమృతము (జన్మరాహిత్యము) లభించగలదు. ఇంద్రుని వజ్రము మాకు తోడై సమస్తము మా పట్ల ‘‘స్వాహా’’। (సువర్లోకస్థానము, దివ్యత్వము సంతరించుకోగలదు)।

    ఓం నమో భగవతే। మహాగరుడాయ। విష్ణువాహనాయ। త్రైలోక్యపరిపూజితాయ।  
    వజ్రనఖ వజ్రతుండాయ। వజ్ర పక్షాలంకృత శరీరాయ। ఏ హ్యేహి। మహా గరుడ।  
    విషం ఛింధి। ఛింధి। ఆవేశయ। ఆవేశయ। ‘హుం’ ‘ఫట్’ ‘స్వాహా’।

భగవానుడు, మహాగరుడుడు, స్వయముగా విష్ణు భగవానుని వాహనము, త్రిలోకములచే విశేషముగా పూజించబడువారు, వజ్రము వంటి గోళ్లు (నఖములు), తుండము గలవారు, వజ్రపు రెక్కలతో అలంకృతమైన శరీరము కలవారు-అగు శ్రీ గరుడస్వామి మేమున్నచోటికి వేంచేసెదరు గాక! వారి రాకతో విషము ఛింధము (ముక్కలు) కాగలదు.

స్వామీ। మా దృశ్య-దేహ-మనో- బుద్ధి-చిత్త-అహంకారములలో ఆత్మానంద స్వరూపులై ఆవేశించండి. ‘హుమ్’ ‘‘ఫట్’’ దివ్యధ్వనుతో మాకు సువర్లోకము ప్రసాదించెదరు గాక. విష్ణువాహనులగు మీరు - మా వద్దకు ‘‘విష్ణుతత్త్వము’’ అనే అమృతమును తెచ్చి మాకు అందించండి.

(విష్ణు తత్త్వము = All - Present and Alpervading Self of "My Self")

సుపర్ణోఽసి గరుత్మాన్। ఓ గరుత్మంతుడా। మీరు సుపర్ణులు. గొప్పరెక్కలు కలవారు. కనుక విష్ణు తత్త్వానుభవమును తెచ్చిపెట్టగల సమర్ధులు.

త్రివృత్తము (Tri-Circular) అగు మీ శిరస్సు - గాయత్రము। (గాయత్రీ స్వరూపము)।

మీ చక్షవులు - సోమము చంద్రరూపము. (చల్లటి చూపులు కలవారు)।

ఆత్మయే - సామవేదము (The song of Athman).

మీ శరీరము - వామదేవము (సమస్తమగు ‘ఇహ’ స్వరూపము)।

రెక్కలు - బృహత్ రథంతరము (ఈ బృహత్ సృష్టి చక్ర స్వరూపములు) (The main wheels of this entire creation).

మీ పుచ్ఛము (తల పుఱ్ఱె/నుదురు) - యజ్ఞా - యజ్ఞీకములు (The Totality - work of the universe).

మీ అంగములు - ఛందస్సులు (Disciplines).

ధిష్ణియాః శఫాః యజూంషి నామ - యజుర్వేదము మీరు అంకుశముతో సహా వేంచేసియున్న గృహము.

ఓ గరుడ దేవాదిదేవా! గొప్ప అందమైన రెక్కలతో సపర్ణులై మీరు (భూలోకమునుండి) భువర్-సువర్లోకము వరకు యధేచ్ఛగా సంచరించగలుగువారు. అమావాస్య - పౌర్ణమిలను దాటించి, సమస్తమునకు మునుముందే ఏర్పడియున్న ‘‘ఓం ఈం’’ అను అక్షర సంజ్ఞయగు బ్రహ్మవిద్యనుప్రసాదించ సమర్ధులు. కనుక మాకు ‘బ్రహ్మవిద్య’ను ప్రసాదించి అనుగ్రహించండి.

తత్కారీ : ‘తత్’ కార స్వరూపులు. తత్ స్వరూపమును ప్రసాదించువారు.

మత్కారీ : సమస్త జీవులలో ‘నేను’గా వేంచేసి ఉన్నవారు. ‘‘నేను-నాది’’ల ఏకస్వరూపులు.

ఆ గరుడ పరమాత్ముడే సమస్తమునందు సంచరిస్తూ, సమస్తము నిర్వర్తిస్తూ ఉన్నారు. ఇదంతా నిర్వర్తిస్తున్న ఆ స్వామి నాకు బ్రహ్మ జ్ఞానము కలుగజేయుదురుగాక! ఆయన విషనాశి। విషదూషిణి। విషహారిణి। ఆస్వామిని ఒక్క క్షణం స్మరించినంతమాత్రం చేత విషము హతమగుచున్నది.

ఇంద్రుని వజ్రము వంటి శ్రీమన్ గరుడ భగవానుని స్మరణము - విషనాగుల విషము కూడా హతము చేసి వేయుచున్నది.

ఆయన ‘బ్రాహ్మీదృష్టి’ అనే ‘అమృతము’ను (మృతస్థితికి అతీతత్వమును) ఆశ్రితులమగు మనకు తెచ్చిపెట్టుటలో సిద్ధహస్తులు.

ఆ గరుడభగవానుడు - అమృతమును మనకు తెచ్చిపెట్టుటలో ఇంద్రవజ్రముగాని, గొప్ప సర్పజాలములుగాని నిరోధములు కలిగించజాలవు. విష్ణు వాహనాయ! శ్రీమన్ గరుడభగవాన్। శరణు। శరణు।

మమ్ములను ‘మృతము’ అనే జనన మరణ చక్రము నుండి తప్పించుటకై సువర్లోకము నుండి అమృతము తెచ్చీచ్చుటలో పరమాద్భుత శక్తి సంపన్నులగు ఆస్వామిని నిరోధించగల శక్తి ఏదీ లేదు. అట్టి గరుడునికి భక్తి-ప్రపత్తులు సమర్పిస్తున్నాము.

⌘ ⌘ ⌘

యది అనంతక దూతోఽసి
యది వా అనంతకః స్వయమ్, - అది అనంతక మహాసర్పముయొక్క ‘దూత’ అయినా (లేక) స్వయముగా అనంతక మహాసర్పమైనాకూడా,

యది వాసుకి దూతోఽసి,
యది వా వాసుకిః స్వయమ్, - వాసుకి మహాసర్పముయొక్క ‘దూత’ అయినా, (లేక) స్వయముగా వాసుకి అయినా కూడా,

యది తక్షక దూతోఽసి,
యది వా తక్షకః స్వయమ్, - తక్షక మహాసర్ప ‘దూత’ అయినా, (లేక) స్వయముగా తక్షకమహా సర్పమయినా,

యది కర్కోటక దూతోఽసి,
యది వా కర్కోటకః స్వయమ్ - కర్కోటక మహాసర్ప ‘దూత’ అయినా, (లేక) స్వయముగా కర్కోటక మహాసర్పమైనా..,

యది పద్మక దూతోఽసి,
యది వా పద్మకః స్వయమ్, - అది పద్మక మహాసర్పమునకు చెందిన ‘దూత’ అయినా, (లేక) స్వయముగా పద్మక మహాసర్పమే అయినా కూడా,

యది మహాపద్మక దూతోఽసి,
యది వా మహాపద్మకః స్వయమ్ - అది మహా పద్మకసర్ప దూతాయినా, (లేక) స్వయముగా మహా పద్మకసర్పమైనా,

యది శంఖక దూతోఽసి,
యది వా శంఖకః స్వయమ్, - అది శంఖక సర్పదూత అయినా, (లేక) స్వయముగా శంఖక మహాసర్పమైనా,

యది గుళిక దూతోఽసి,
యది వా గుళికః స్వయమ్, - అది గుళిక సర్పదూత అయినా, (లేక) స్వయముగా గుళిక మహాసర్పమే అయినా కూడా..,

యది పౌండ్ర కాళిక దూతోఽసి,
యది వా పౌండ్ర కాళికః స్వయమ్,-అది పౌండ్రకాళిక సర్పదూత అయినా (లేక) స్వయముగా పౌండ్రకాళికా మహాసర్పమైనా కూడా,

యది నాగక దూతోఽసి
యది వా నాగకః స్వయమ్..., అది నాగక దూత అయినా, (లేక) స్వయముగా నాగకమహాసర్పమైనా కూడా...,

అట్లాగే.., అది :- సాలె పురుగు విషమైనా, రాక్షస సాలెపురుగు విషమైనా, తేలు విషమైనా, స్థావర-జంగముల సంబంధమైన ఏ విషమైనా కూడా - మహాగరుడ మంత్ర స్మరణచే గరుడ భగవానునికి భక్తితో నమస్కరించుటచే - అమృతత్వము పొందుటలో మమ్ము నిరోధించలేవు.

అట్టి విషము :

తత్కారీ, మత్కారీ, విషనాశనీ విషదూషినీ విషహారిణీ హతం।	‘తత్’ కారకుడు, ‘మత్’ కారకుడు విషము నశింపజేయువాడు, విషమును హరించువాడు అగు గరుడ భగవానుని స్మరణచే హతమయిపోగలదు.
ఇంద్రస్య వజ్రేణ విషం హతమ్।	తన మాతృదేవత అగు వినతయొక్క దాస్యమును తొలగించటానికి అమృతమును దివ్యలోకము నుండి తెస్తున్నప్పుడు ఇంద్ర వజ్రమును కూడా జయించివేసినట్టి గరుడ దేవునిచే (విషయ రూప) విషము హతమవగలదు.
తే బ్రహ్మణా విషమింద్రస్య వజ్రేన స్వాహా।	బ్రహ్మదేవుని చేతను, ఇంద్ర వజ్రముచేతను, ఆ విషము తొలగించబడి, గరుడ భగవానునిచే అమృతమగు సువర్లోకము ప్రసాదించబడగలదు.

అనంత, వాసుకి, తక్షక, కర్కోటక, పద్మక, మహాపద్మక, శంఖగుళిక, పౌండ్ర కాళిక, నాగక, మొదలైన దివ్యనాగుల వలన, మహానాగుల, విషతుండుల, విషనాగుల, విషదంష్ట్రుల, విషాంగుల, విషపుచ్ఛుల, విశ్వచారుల, తేలుల, సాలెపురుగుల, రాక్షస సాలె పురుగుల, ఎముకల, బల్లుల, చిన్నపురుగుల, విషవాయువుల వలన గాని, ఇల్లు - కొండ- పుట్ట గుహ-అగ్ని మొదలైన వాటిలో నివసించే విష జీవుల వలనగాని; కట్టె-గడ్డి-చెట్టు, - చెట్టుతొర్రలలో ఉండే విష పురుగుల వలన గాని, చెట్టు మొదలు - బెరడు, బంక (జిగురు), ఆకు - పువ్వు-కాయ-పండులలో పుట్టుచున్న విష-చెడు పురుగుల విషము వలనగాని, కోతి - కుక్క - పిల్లి - నక్క - పెద్దపులి - అడవి పంది మొదలైన క్రూరజంతువుల విషము నుండి గాని కలుగు ఆపదలను, విషమును విరుగుడు చేయగలుగునది - శ్రీ భగవాన్ గరుడోపాసనామంత్రము.

ఉద్బీజముల నుండి - (నేల నుండి పుట్టే వృక్షజాలము మొదలైనవాటి నుండి),
జరాయుజముల నుండి - (‘మావి’ నుండి పుట్టే మానవులు, జంతువులు మొదలైనవాటి నుండి),
అండజముల నుండి - (గ్రుడ్డు నుండి పుట్టే పక్షులు మొదలైనవాటి నుండి),
స్వేదజములు - (చెమట నుండి పుట్టే సూక్ష్మజీవుల నుండి) -
ఏర్పడే విషము - ప్రమాదముల నుండి గరుడ భగవానుడు కాపాడుదురుగాక! స్వామీ! గరుడదేవా! గొప్ప రెక్కలుగల మీరే కాపాడగలరు!

మమ్ములను ‘విషము’ నుండి ‘అమృతము’నకు జేర్చండి. మా పట్ల మృత్యువును అమృతముగా తీర్చిదిద్దండి.

✳︎ బాణము మొదలైన ఆయుధముల దెబ్బల నుండి,
✳︎ స్ఫోటకము - వ్రణము (పుండు) - మహావ్రణము (రాచపుండు) వలన కలిగే బాధల నుండి,
✳︎ పెట్టుడు - మందుల విషము నుండి,
✳︎ భూత-బేతాల-కూష్మాండ పిశాచ-ప్రేత-రాక్షస-యక్ష మొదలైన భయంకారాకారుల వలన వచ్చిపడే భయ-బాధల నుండి,
✳︎ విషతుండముల కాటుల నుండి, విషాంగుల నుండి, విష పుచ్ఛుల నుండి
- మీ గరుడమంత్రము కాపాడగలదు.

స్వామీ! మీరు విషములకే విషము। విషమును దూరము చేయువారు। శరీరములో ప్రవేశించిన విషమును శోషింపజేయువారు. నశింపజేయువారు। హరింపజేయువారు। విషమును వినష్టముచేయుటలో విషము పట్ల వజ్ర ఘాతము వంటివారు.

గరుడ భగవానుని తలచినంతమాత్రముచేతనే - శరీరములోని, అంతరంగ చతుష్టయము, బాహ్యములోని విషము, విషభావములు, విషము వలన ప్రమాదములు సమసిపోగలవు. అవి ఇంక హాని కలిగించలేవు.

గరుడమంత్రము జన్మజరా మరణ రహితమగు అమృత ప్రదాత।

⌘ ⌘ ⌘

ఎవరైతే ఈ ఉపనిషత్‌లోని - ‘‘విషమునకు వ్యతిరేకమైనట్టి ‘అమృతము’ (జన్మరాహిత్యము, మోక్షరహస్యము)’’ ను తెలుసుకుంటారో,..., వారు సర్వత్రా సిద్ధి పొందగలరు.

ఈ జీవులు శారీరక-మానసిక-బుద్ధి చాంచల్య బాధలు పొందుచున్నప్పుడు, అట్టివారు అమావాస్యనాడు ప్రారంభించి ఈ ఉపనిషత్ పఠిస్తే, అధ్యయనము చేస్తూ ఉంటే..., అట్టివానిని - ఆతడు జీవించి ఉన్నవాళ్లు సర్పములు హింసించవు. దైనందికంగా పఠిస్తూ ఉంటే, వర్ణనాతీతములగు శుభములు చేకూరగలవు.

---

మహాగారుడ మంత్రోపాసకులకు వ్రతమునకు సంబంధించిన కొన్ని విధులు

అష్ఠౌ బ్రాహ్మణాన్ గ్రాహయిత్వా తృణేన మోచయేత్।	‘8’ మంది బ్రాహ్మణులను స్పృశించి తృణములను, ప్రపత్తులను సమర్పించాలి. (తాంబూల దానము చేయాలి)
శతం బ్రాహ్మణాన్ గ్రాహయిత్వా చక్షుషా మోచయేత్।	‘100’ మంది బ్రాహ్మణులను స్పృశించి కళ్లతో నమస్కరించాలి.
సహస్రం బ్రాహ్మణాన్ గ్రాహయిత్వా మనసా మోచయేత్।	‘1000’ మంది బ్రాహ్మణులను మనస్సుతో తలచుకొని ఉపాసించాలి.

జలము నుండి, గడ్డి నుండి, కట్టె నుండి, కర్రపుల్ల నుండి అట్టివాడు గండములు పొందక విముచ్యుడౌతాడు. సంసార విషము అవిషమై, ఆతని పట్ల అమృతత్వము సుప్రకాశమవగలదు.

ఈ విధంగా భగవంతుడగు బ్రహ్మదేవుడు ‘‘బ్రహ్మసూత్రగారుత్మంతము’’ - నారదాది మహర్షులకు, తదితర బ్రహ్మమానసపుత్రులకు, మునులకు, ఆశ్రితులగు భక్తజనులకు బోధించటము జరిగింది.

🙏 ఇతి గారుడ ఉపనిషత్! ఓం శాంతిః। శాంతిః। శాంతిః।